Медициналық жоғары оқу орны студенттерінің нақты тамақтануын бағалау

Abstract

Өзектілігі. Тамақтану тұрғындар денсаулық жағдайына әсер етуші негізгі факторлардың біріне жатады. Жастардың денсаулығы маңыздылығын және оның болашақтағы экономикалық, әлеуметтік және мәдени ел потенциалын қамтамасыз етуші факторы екенін ескере отырып, біздер - студенттер тамақтану жағдайын зерделедік. Зерттеуіміздің мақсаты: Марат Оспанов атындағы Батыс Қазақстан мемлекеттік медицина университеті студенттерінің нақты тамақтану ерекшеліктерін зерделеу. Зерттеу материалы мен әдістері: зерттеу нысаны болып 20-21 жастағы 105 студент болды. Олардың ішінде бойжеткендер - 80,9%, бозбалалар - 19,1 % құрады. Барлық студенттер Марат Оспанов атындағы БҚММУ «Қоғамдық денсаулық сақтау» факультетінде оқиды. Нақты тамақтануды зерделеу үшін тәуліктік энергия қажеттілігі, 24 сағаттық тамақтануды жаңғырту әдісімен азық-түліктегі тағамдық заттар құрамы анықталды. Зерттеу студенттерге сауалнама және сұхбаттасумен жүргізілді, ол үшін арнайы құрастырылған сауалнамалар қолданылды, онда жан-жақты зерттеу үшін барлық параметрлер берілген. Нәтижелері: Респонденттердің көпшілігінде мынадай симптомдар байқалды, әлсіздік, бастың ауыруы, тез шаршағыштық, бұл тамақтану бұзылысымен де, жоғары күйзелістік жүктемелермен де байланысты болуы мүмкін. (71,6±4,8)% бойжеткендер мен (29,4±1,04) % бозбалаларда ас қорыту трактысы аурулары бар екендігі анықталды (эпигастрии аймағының қыжылдауы, тағам қабылдағаннан кейінгі «ауырлық» сезімі). (75,6±40,3) % бойжеткендермен (70,5±32,5)% бозбалалардың шектен тыс тітіркенгіштік, мазасыздық, ұйқының нашарлығы, есте сақтаудың және зейіннің нашарлауы, ой еңбегіне қабілеттіліктің төмендеуі шағымдары байқалды. Тері жамылғысы мен көз коньюнктивасының бозаруы, әлсіздік, физикалық күш түскенде ентігу (22,9±1,1)% бойжеткендер мен (35,2±2,7)% бозбалаларда анықталды. Кариес (51,3±15)% бойжеткендер мен (52,9±17) % бозбалаларда анықталды. Қорытынды: Студенттердің нақты тамақтануы рационалды емес, адекватты емес, тамақтану тәртібінің айқын бұзылыстары анықталды. Студент-медиктердің рационы негізгі тағамдық заттардың құрамы бойынша балансталмаған. Екі есеге жақын майлардың қолданылуы жоғарылаған, көмірсулар негізінде ұннан жасалған (макарон, кондитер) тағамдармен көрсетілген. Студенттердің көпшілігінде (70% жоғары) алиментарлы-тәуелді жұқпалы емес аурулардың белгілері байқалады.