Мұнай-газ өндіруші аймақ тұрғындары денсаулығы қалыптасуының медициналық-әлеуметтік аспектілері

Abstract

Тақырыптың өзектілігі Дүниежүзінде экологиялық жағдайдың нашарлау қарқынының ұдайы өсуі байқалуда. Қолайсыз антропогендік және техногендік әсерлер тұрғындардың денсаулық жағдайына айтарлықтай әсер етеді және белгілі бір аурулардың даму қауіпін арттырады. Қазақстан Республикасының Ата заңында көрсетілгендей адам және адам өмірі мемлекет қазынасы және адамдар өз денсаулығын қорғауға құқылы [3], осы себепті территориялық ерекшеліктерін ескеріп, тұрғындар денсаулығының деңгейіне мониторинг жасап, оны қадағалауда ұстау басты міндеттердің бірі [4]. Қолайсыз санитарлық-гигиеналық жағдай тұрғындардың денсаулық деңгейіне әсер ететін маңызды аспект болып табылады. Қоршаған ортаның ластануы, жедел экономикалық өсу және басқа да әлеуметтік факторлар тұрғындардың денсаулығына кері әсерін тигізіп, нәтижесінде соңғы екі он жылдықта денсаулық сақтау шығындарын жоғарылатты. Техногендік жүктеменің салдарынан қоршаған орта жай-күйінің нашарлауын, тұрғындар денсаулығына теріс факторлардың әсер етуінің өсуін өңірлердің тұрақты дамуының экологиялық қауіпсіздігінің негізгі қатерлері ретінде қарастыруда. Қазіргі уақытта Қазақстанда өнеркәсіптің мұнай-газ өндіру және мұнай-газ өңдеу салалары қарқынды дамуда. Қарқынды экономиканың ауқымды дамуы күн тәртібінде экологиямен қатар тұрғындардың өмір сапасы, әлеуметтік, экономикалық, психологиялық бағыттарында бірқатар аса маңызды мәселелерді айқындады.